پابندیوں کے مطالبے کی حمایت نہ کرنے کا پیغام دیتے ہوئے چین نے سیکرٹری سطح سے نیچے کے سفارتی اہلکار کو اجلاس میں شرکت کے لیے نیویارک بھیجا ہے۔
|
ایران کے جوہری پروگرام کے خلاف مزید پابندیوں پر غور کے لیے امریکا سمیت چھ عالمی طاقتوں کا اجلاس آج ہوگا۔ نیو یارک میں ہونے والے اجلاس میں امریکا، برطانیہ، فرانس، روس اور جرمنی کے اعلیٰ حکام شرکت کریں گے۔ جبکہ مغرب کی جانب سے سخت پابندیوں کے مطالبے کی حمایت نہ کرنے کا پیغام دیتے ہوئے چین نے سیکرٹری سطح سے نیچے کے سفارتی اہلکار کو اجلاس میں شرکت کے لیے نیویارک بھیجا ہے۔ امریکی وزیر خارجہ ہلیری کلنٹن نے چند روز قبل اجلاس کے انعقاد کا اعلان کرتے ہوئے کہا تھا کہ واشنگٹن اس نتیجے پر پہنچاہے کہ ایران کے جوہری پروگرام کو شفاف بنانے کے لیے ایسی پابندیاں عائد کی جائیں جن کے اثرات ایران کے برسراقتدار طبقے پر پڑ سکیں تاکہ ایران کی فیصلہ ساز قوتوں کو غیر موثر کیا جا سکے۔ اجلاس میں ایران پر نئی اور سخت پابندیوں کی تجویز دی جائے گی۔