سرینگر/ جموں کشمیر انجمن شرعی شیعیان کے اہتمام سے ماگام بڈگام میں دارالقرآن کا قیام عمل میں لایا گیا، جہاں خواہشمند طالبات کو مختلف قرآنی کورسز بشمول حُسنِ قرائت، تجوید، روخوانی و رواں خوانی کے علاوہ مفاہیم اور تفسیر وغیرہ کی تربیت دی جائے گی۔ انجمن شرعی شیعیان کے سربراہ اور سینئر حریت رہنما حجت الاسلام والمسلمین آغا سید حسن الموسوی الصفوی نے علاقہ کے معززین اور تنظیمی اراکین و عاملین کی موجودگی میں دارالقرآن کی رسم افتتاح انجام دی۔ اس موقع پر منعقدہ تقریب سے اظہار خیال کرتے ہوئے آغا صاحب نے کہا کہ قرآن حکیم نجات و ہدایت اور مقصد حیات کا ابدی سرچشمہ ہے، اور اس آخری صحیفہ آسمانی سے عشق و عقیدت کا کم سے کم تقاضا یہ ہے کہ اس کی تلاوت صحیح تلفظ و تجوید اور خوش الحانی کے ساتھ کی جائے۔ انہوں نے کہا کہ کتاب اللہ سے تمسک کا ناگزیر تقاضا یہ ہے کہ مسلمان قرآن کریم کے فکر و پیغام کی طرف متوجہ ہو کر قرآنی تعلیمات کو اپنا ضابطہ حیات بنائیں۔ اسی مقصد کیلئے انجمن شرعی شیعیان نے ایک ہمہ گیر پروگرام کے تحت تمام تنظیمی زونوں میں دارالقرآن قائم کرنے کا عمل شروع کیا ہے۔ آغا صاحب نے علاقے کے عوام سے تاکید کی کہ وہ اپنے بچوں کو مذکورہ دارالقرآن میں بھیج کر بھر پور استفادہ کریں۔