اسلامی جمہوریہ ایران کے صدر کی تقریب حلف برداری میں ہندوستانی وزیراعظم کے خصوصی ایلچی کی حیثیت سے ٹرانسپورٹ کے مرکزی وزیرنتن گڈکری شرکت کریں گے۔
ہندوستانی وزیراعظم کے خصوصی ایلچی اور ٹرانسپورٹ کے مرکزی وزیر نتن گڈکری نے نئی دہلی سے تہران کے لئے روانہ ہونے سے قبل کہا کہ وہ تہران میں صدر ڈاکٹر حسن روحانی کی تقریب حلف برداری میں شرکت کے ساتھ ایران کی پارلیمنٹ کے اسپیکر ڈاکٹرعلی لاریجانی اور ایران کے ٹرانسپورٹ کے وزیر عباس آخوندی سے ملاقات کریں گے- نتن گڈکری نے اسلامی جمہوریہ ایران اور ہندوستان کے درمیان تعلقات کی توسیع پر زور دیتے ہوئے کہا کہ چابہار بندرگاہ کا منصوبہ تیزی کے ساتھ مکمل ہو رہا ہے اور ہندوستان اس بندرگاہ میں سرمایہ کاری کرنا چاہتا ہے- انہوں نے کہا کہ ہندوستان اور ایران کے درمیان اقتصادی سرگرمیوں کی توسیع دونوں ملکوں کے نفع میں ہے اور اس کے لئے دونوں ملکوں میں بے شمار مواقع پائے جاتے ہیں-