Əhli Beyt (əleyhimus səlam) -ABNA- Xəbər Agentliyinin verdiyi xəbərə əsasən, Azərbaycanla İran arasında televizya və radio işlərini tənzimləyəcək komissiyanın yaradılması gözlənilir.
Bu barədə Rabitə və Yüksək Texnologiyalar Nazirliyindən məlumat verilib.
Bu gün ölkəmizdə səfərdə olan İran İslam Respublikasının Radio-Televiziya Təşkilatının sədri İzzətullah Zərqami Rabitə və Yyüksək Texnologiyalar naziri Əli Abbasovla görüşüb.
Görüşdə qarşılıqlı maraq doğuran istiqamətlər üzrə radio və televiziyada birgə yayımların təşkili ilə bağlı fikir mübadiləsi aparılıb.
Görüşdə Ə.Abbasov Azərbaycanla İran arasında televiziya və radio işlərini tənzimləyəcək komissiyanın yaradılması təklifi ilə çıxış edib. Nazir qeyd edib ki, hazırda teleradio yayımını həyata keçirən qurumlarla danışıqlar aparılır və müəyyən qərarlar qəbul edildikdən sonra bu haqda ətraflı məlumat veriləcək:
"Müştərək media komissiyası ilə bağlı ətraflı müzakirələr aparılacaq. Müzakirələrdən sonra birgə komissiyanın yaradılması üçün bəzi hüquqi prosedurlar müəyyənləşdiriləcək".
İ.Zərqami təklifi məmnuniyyətlə qəbul edib. O, qonaq ölkələrin televiziyaları tərəfindən birgə proqram və verilişlər hazırlanmasını istədiklərini bildirib.
Görüşdə həmçinin birgə komissiyanın fəaliyyəti ilə bağlı qarşılıqlı maraq doğuran məsələlər də müzakirə olunub.
Diqqət: Xəbərdən istifadə etdikdə mənbəyə istinad lazımdır
source : www.abna.ir
