DEVAMM - Dİni Etiqad və Vicdan Azadlıqlarının Müdafiə Mərkəzi dindarlara qarşı növbəti təqib dalğasından ciddi narahatlığını bildirir. Belə ki, avqustun 11-nə olan məlumata görə, islamazeri.az internet-qəzetinin baş redaktoru Hacı Ramin Bayramov, ilahiyyatçı Hacı Abgül Süleymanov, AİP funksioneri Kərbəlayi Arif Qəniyev müxtəlif anlaşılmaz ittihamlarla həbs edilmişlər. Müqəddəs Ramazan ayında edilən bu həbslər, inanclı insanları xüsusilə sarsıdır.
Digər tərəfdən, dini mühitdə oruc tutan, namaz qılan kimi, ibadət əhli kimi tanınan insanların narkotik saxlama və qəbul etmə, silah-sursat tədarük etmə kimi mümkünsüz ittihamlarla həbs edilməsi insan haqlarının pozulması halı olmaqla bərabər, mənəvi dəyərlərə qarşı sayğısızlıq kimi də qiymətləndirilir.
DEVAMM olaraq hesab edirik ki, bu təqib və həbslər sözügedən şəxslərin özünüifadəsi ilə bağlıdır və faktiki olaraq, onlara inkriminasiya edilən ittihamlara heç bir aidiyyətləri yoxdur.
DEVAMM olaraq, Hacı Ramin Bayramovun, Hacı Abgül Süleymanovun, Kərbəlayi Arif Qəniyevin, eləcə də həbsdə olan digər ilahiyyatçıların və dindarların təcili azadlığa buraxılması üçün çağırış edirik.
source : ابنا
