Saat 12-yə kimi paytaxtın əksər ticarət mərkəzləri və dükanları işləməyib. Küçələrdə ehsan süfrələri təşkil olunub, insanlara çay, halva verilib
Bakıda Aşura
Əhli Beyt xəbər agentliyinin verdiyi xəbərə əsasən : bu gün bir sıra müsəlman ölkələrində, o cümlədəm Azərbaycanda da Aşura günü qeyd olunur. Bununla əlaqədar paytaxtın bir neçə məscidində olduq. İlk öncə qeyd edək ki, bu gün saat 12-yə kimi paytaxtın əksər ticarət mərkəzləri və dükanları işləməyib. Küçələrdə ehsan süfrələri təşkil olunub, insanlara çay, halva verilib.
İçəri şəhərdə yerləşən Cümə məscidinin qarşısında vətəndaşlar qan verərək məscidə daxil olurdular. Məscidlərin qarşısında polis və təcili yardım maşınları növbə çəkirdilər. Kərbəlayi Abdullah məscidinin qarşısında isə təcili yardım maşını yox idi. Yalnız məscidin 50 metrliyində polis əraziyə nəzarət edirdi. Məscidlərdə xütbələr oxunur, Kərbəla şəhidlərinin ruhuna dualar edilirdi. Müşahidələrimizə görə, hər hansı xoşagəlməz hal qeydə alınmayıb.
Xatırladaq ki, 1372 il əvvəl Məhərrəm ayının 10-cu günündə Məhəmməd Peyğəmbərin (s) nəvəsi, İmam Əlinin oğlu İmam Hüseyn Kərbəla yaxınlığında öz tərəfdarları ilə birgə şəhid olublar. Onlar Yezid ibn Müaviyənin ordusu tərəfindən qətlə yetirilib. O vaxtdan indiyədək həmin gün, Məhərrəm ayının 10-u Aşura mərasimi qeyd olunur və 40 gün yas saxlanılır.
source : ابنا