"Feyzulla Axundov AİP-in üzvü deyil və real və ya qərəzli şəkildə ittiham olunmasında AİP-in adının hallanmasını yolverilməz hesab edirik"
Əhli Beyt xəbər agentliyinin verdiyi xəbərə əsasən:
Dövlət Sərhəd Xidmətinin (DSX) mətbuat mərkəzindən bildirilib ki, Azərbaycan İslam Partiyasının üzvü Feyzulla Höcətulla oğlu Axundov İrandan Azərbaycana gələrkən, Astara Sərhəd Nəzarət Məntəqəsində yoxlanışda anusundan 53 qram heroin və 12 qram həşiş aşkar olunaraq götürülüb. Hadisədə adı hallanan Azərbaycan İslam Partiyası bəyanat verib. Bəyanatda deyilir:
"Bu gün ölkəmizin kütləvi informasiya vasitələrində yayılan məlumata görə, Astara gömrükxanasında Azərbaycan vətəndaşı olan Feyzulla Axundov İrandan Azərbaycan ərazisinə keçərkən saxlanılıb. Xatırladaq ki, saxlanılan şəxsin üzərində narkotik maddə aşkar edilib. Kütləvi informasiya vasitələrində F.Axundov Azərbaycan İslam Partiyasının üzvü kimi qeyd olunub. AİP-in hazırkı rəhbərliyi partiyanın yerli Astara rayon komitəsi, komitənin özək təşkilatları ilə saxladığı əlaqələrə əsaslanaraq, bəyan edir ki, Feyzulla Axundov AİP-in üzvü deyil və real və ya qərəzli şəkildə ittiham olunmasında AİP-in adının hallanmasını yolverilməz hesab edir.
Bu, partiyamızın ünvanına gələcəkdə də bu kimi ləkələrin gətirilməsini, ölkəmizdə insanların əqidə azadlığına qarşı antikonstitusion addım kimi qiymətləndiririk."
source : ابنا
