إلى السيدة رقية عليها السلام

أکو بعض الأوادم گالو اهواي   توَصْفوها عظيمه هالصغيره
دخلّي انسولف و خلهم يعرفون   رقيه اشگد عزيزه اشگد چبيره
يا طفل الأبوه يشبه للِحْسين   او مثل حضن السبط يصبح سريره
رقيه اتعوّدت بحضان الِحْسين   تنام و لا تنام اعله الحصيره
يغطّيها ابعباته سيد الاحرار   او غِطاها ايكون أنعم من حريره
رقيه من أبوها اتعلّمت هاي   بسمها لو نخه واحد تجيره
وِ اتْعَلْمَت تِقَسْمِ الخبزه نصين   او تاخذ نصها و النص للفقيره
نعم هذي رقيَّه اْمّ الكرامات   سخيّه و للسخه بيديها غيره
من أنخاها تگضي حاجتي ابساع   او كرمها اعليّه دائم للأخيره
اديها ازغيره بس اچفوف الِزْغار   أحله اتحِل مشاكلنا الچبيره
مو بس القديم انشوف للآن   مقام العدها ياهو الصح نظيره
يزيد اشگد جِفاها و كلنه ندريه   لَمَن بالشام دخّلها أسيره
تره التاريخ كله عبره متروس   العقل محتار بيه اشلون حيره
قصر ذاك اللعين و حِشمته وين؟   وين ايزيد وينه ابيا حفيره؟
أمير الشام وينه و ماهُو موجود   او رقيه الباقيه و هيّه الأميره
او بعد بالأربعينيه تشوفون   كرامتها اشكبرها اشگد چثيره