Sual 33:Quranın مُسْتَضْعَف(mustəzəf)-adlandırdığı şəxslər kimlərdir? Xahiş edirik onların məhşərə necə toplanacaqları və necə cəzalandırılacaqları barədə acıqlama verəsiniz.
Cavab:Verdiyimiz 5-ci cavabda bu barədə açıqlama vermişdik. Lakin deyilənlərə dahada aydınlıq gətirmək üçün Əllamə Məclisinin ,,Həqqul yəqin”adlı kitabında nəql etdiyi mətləbə işarə etmək istəyirəm.Bu barədə ümumilikdə bunu bilmək lazımdır ki, Quran ayələrindən, hədis və rəvayətlərdən, habelə əldə olunan əqli və nəqli dəlillərdən belə məlum olur ki, Allah-Təala mütləq adil bir varlıqdır,O kimsəyə zərrə qədərdə olsun zülm və haqsızlıq etməz.Qiyamət günü uşaqları,ruhi xəstələri, yaxşını pisdən ayıra bilməyən şəxsləri, üzürlü olan və hüccəti üzərlərinə tamamlayan insanlara əzab verməz. Onlar ya cənnətlə cəhənnəm arasında Əraf adlanan yerdə,ya cənnətin aşağı təbəqələrində saxlanılar, yada cənnət əhlinə xidmət edərlər. Mərhum Koleyni ,,Üsuli-Kafi”-də Zərarənin nəql etdiyi mötəbər rəvayəti işarə edərək deyir: Günlərin biri İmam Cəfər Sadiq(ə)-dan soruşdum:Qiyamət günü yetginlik yaşına çatmamış uşaqların aqibəti necə olacaq? Buyurdu: Bu barədə Allah Peyğəmbərindən soruşduqda buyurdu:Allah onların aqibətini daha yaxşı bilir. Sonra buyurdu: Bu barədə müzakirə etməyin və bunu Allahın elminə həvalə edin.Elə isə biz də bu barədə hər hansı bir fikir irəli sürməyək və onların aqibətini Allahın ədalət və fəzlinə həvalə edək.O da Öz ədalət və fəzlinə nəyi məqsədə uyğun bilirsə qoy onu da etsin. Bunu da bilmək lazımdır ki,onlar cənnət əhlinə xidmət etsələrdə bundan yorulmaz, əksinə ləzzət alarlar. Necəki mələklər bu işı görməkdən ləzzət alarlar. Burada bunu da qeyd etmək lazımdır ki, Quranda haqlarında söhbət açılan ,,mustəzəfin”-lər möminlərin az yaşlarında dünyalarını dəyişən uşaqlarından fərqli bir dəstədir. Onların da valideyinlərini daha çox sevindirmək üçün axirət dünyasında onlara qovuşmaları və cənnətdə onlarla birlikdə olmaları mümkün olası bir haldır.Şiə məzhəbinin dörd mötəbər hədis kitabında İmam Cəfər Sadiq(ə)-dan nəql olunan hədislərdən birində deyilir: (Möminlərin az yaşlarında dünyalarının dəyişmiş uşaqlarının üzərlərinə heç bir şəri vəzifə düşməsədə Allah-Təala axirət günü valideyinlərinin gözünə işıq gəlsin və onların sevinc və fərəhinə səbəb olsun deyə onları valideyinlərinə qovuşdurar.)
************
