شام کے مفتی اعظم کی ہندوستان کی مرکزی وزیر نجمہ ہیبت اللہ سے ملاقات

۔ نئی دہلی سے یو این آئی کی رپورٹ کے مطابق شام کے مفتی اعظم ڈاکٹر محمد بدرالدین محمد ادیب حسون نے جمعرات کی شام کو ہندوستان کی مرکزی وزیر برائے اقلیتی امور نجمہ ہیبت اللہ سے ان کی رہائش گاہ پر ملاقات کی۔ اس ملاقات میں شام کی صورت حال اور دہشت گرد گروہ داعش سے شام کو درپیش خطرات کے بارے میں تفصیلی تبادلہ خیال کیا گیا۔

ملاقات کے دوران نجمہ ہیبت اللہ نے شام کے مفتی اعظم کو شام کی صورت حال کے بارے میں ہندوستان کی تشویش سے آگاہ کیا۔ نجمہ ہیبت اللہ نے کہا کہ شامی حکومت ہی سیاسی مذاکرات کے ذریعہ مسائل کا قابل قبول حل نکال کر تشدد پر قابو پا سکتی ہے۔ انہوں نے کہا کہ شام وسطی ایشیا میں ہندوستان کا دوست ملک ہے اور دونوں ملکوں کے درمیان دیرینہ دوستانہ تعلقات ہیں۔ نجمہ ہیبت اللہ کا کہنا تھا کہ ہندوستان شام میں امن و استحکام کا خواہاں ہے تاکہ ملک کو تشدد سے پاک کر کے شامی حکومت اپنے ملک کی ترقی اور عوامی بہبود کے کاموں پر توجہ مرکوز کر سکے۔