ایران کےخلاف پابندیاں غیر قانونی، جنوبی افریقہ

جنوبی افریقہ کی وزیر خارجہ مائٹ انکانا ماشابانہ نے اتوار کے روز ایران کے چیمبر آف کامرس میں تاجروں اور اقتصادی ماہرین کے اجتماع میں کہا کہ ایران کے خلاف عائد پابندیاں غیر منطقی، غیر منصفانہ، یک طرفہ، اور غیر قانونی ہیں۔ جنوبی افریقہ کی وزیر خارجہ نے کہا کہ پابندیوں سے ایران کے تجارتی شریکوں کی معیشت پر منفی اثرات مرتب ہورہے ہیں اور جنوبی افریقہ پابندیوں کے خاتمے کا انتظار کئے بغیر ایران کے ساتھ تجارت کرے گا۔ ماشابانہ نے ایران میں جنوبی افریقہ کی سرمایہ کاری کا ذکر کرتے ہوئے کہا کہ ان کا ملک ایران کے ساتھ تعلقات کو زیادہ سے زیادہ مستحکم بنانے کا تہیہ کئے ہوئے ہے اور دونوں ملکوں کے تاجروں، اور کاروباری اداروں کو باہمی تعاون میں فروغ کے لئے ان مواقع سے فائدہ اٹھانا چاہئے۔