اسلام آباد میں محرم کے دوران ڈرون کیمرے استعمال کرنے کا فیصلہ

اسلام آباد میں محرم کے دوران پولیس نے جدید ترین سیکیورٹی کیمروں کے استعمال کا فیصلہ کر لیا۔ سرویلنس کیمروں کے علاوہ پہلی مرتبہ ڈرون کیمرے بھی استعمال کئے جائیں گے۔ سیکیورٹی کا یہ سسٹم اسلام آباد کو سیف سٹی منصوبہ مکمل ہونے کے بعداستعمال کیا جائے گا۔ محرم میں تجرباتی بنیادوں پر اس سسٹم کو استعمال کرنے کا فیصلہ کیا گیا ہے۔ ایس ایس پی اسلام آباد ساجد کیا نی کے مطابق محرم الحرام کے دوران اسلام آباد میں پولیس، رینجرز اور دیگر قانون نافذ کرنے والے اداروں کی بھاری تعداد اپنے فرائض انجام دے گی، جبکہ اسلام آباد میں شہریوں کے جان و مال کے تحفظ کے لئے جدید ترین سیکیورٹی کیمروں کا استعمال بھی کیا جائے گا، جہاں جہاں مجالس و جلوس نکالے جائیں گے وہاں ڈرون کیمروں کا استعمال بھی کیا جائے گا۔