صوبہ سندھ کے ضلع شکارپور کے علاقے لکھی در میں امام بارگاہ کے اندر دھماکے سے 20 افراد شہید اور 55 سے زائد زخمی ہوگئے۔ حکام نے شہید ہونے والوں کی تعداد میں اضافے کا خدشہ ظاہر کیا ہے، ایس ایس پی ثاقب اسماعیل کا کہنا ہے کہ دھماکہ نماز جمعہ کے خطبہ کے دوران ہوا۔ تفصیلات کے مطابق دھماکہ مسجد و امام بارگاہ کربلائے معلٰی میں نماز جمعہ کا خطبہ جاری تھا کہ اچانک زور دار دھماکہ ہوا، دھماکے کے وقت نمازیوں کی بڑی تعداد امام بارگاہ میں موجود تھی۔ دھماکہ اس قدر شدید تھا کہ اس کی آواز کئی کلو میٹر دور تک سنی گئی۔
پولیس اور امدادی ٹیموں نے موقع پر پہنچ کر لاشوں اور زخمیوں کو سول اسپتال شکارپور منتقل کیا۔ سول اسپتال کے ایم ایس نے 20 افراد کے جاں بحق ہونے اور 55 کے زخمی ہونے کی تصدیق کی ہے۔ پولیس نے علاقے کو گھیرے میں لے کر شواہد اکٹھے کرنا شروع کر دیئے ہیں، تاہم فوری طور پر دھماکے کی نوعیت معلوم نہیں ہوسکی۔ لکھی در کے علاقے میں بہت سی مساجد اور دیگر عبادت گاہیں ہیں اور یہ گنجان علاقہ ہے۔
source : www.abna.ir
