سری لنکا دھماکوں میں انتہائی مطلوب ملزم زہران ہاشم کے ہلاک ہونے کی تصدیق

داعش کی جانب سے جاری ویڈیو میں ہاشم زہران کو واضح طور پر دیکھا جا سکتا ہے

اہل بیت(ع) نیوز ایجنسی ۔ ابنا ۔ کی رپورٹ کے مطابق صدر میتھری پالا نے ہنگامی پریس کانفرنس میں سری لنکا میں گرجا گھروں اور ہوٹلوں پر خود کش حملے کے ماسٹر مائنڈ زہران ہاشم کے ہلاک ہونے کی تصدیق کردی ہے۔ سی سی ٹی وی فوٹیجز سے تصدیق ہوتی ہے کہ ہاشم شنگریلا ہوٹل دھماکے میں ہلاک ہوا جہاں اس کے ساتھ ایک اور دہشت گرد الحام بھی موجود تھا۔

زہران ہاشم مقامی شدت پسند تنظیم التوحید کے مرکزی رہنماؤں میں سے تھا تاہم داعش کی جانب سے حملے کی ذمہ داری قبول کرنے کے ایک دن بعد ایک ویڈیو ریلیز کی گئی جس میں زہران ہاشم کو دیگر 6 نقاب پوش جنگجوؤں کے ساتھ دیکھا جا سکتا ہے۔ اس ویڈیو میں صرف زہران ہاشم نے اپنا چہرہ نہیں چھپایا ہوا تھا۔

زہران ہاشم پر بدھ مت کیخلاف اشتعال انگیزی پھیلانے اور بدھا کے مجسموں کو تباہ کرنے کے الزامات ہیں تاہم کچھ عرصے قبل ہاشم زہروان نے مقامی شدت پسند تنظیم التوحید سے علیحدگی اختیار کرتے ہوئے اپنی سربراہی میں ایک چھوٹا سا گروہ تشکیل دیا تھا۔